ಅನುವಾದಿತ ಕವನ - ನಾನು ಹೆಣ್ಣು ಮಗಳೇನೆ

[ಈ ಹಾಡು ತೆಲುಗಿನಿಂದ ಕನ್ನಡಕ್ಕೆ ಅನುವಾದ ಹಾಡು. ಮಧುಪ್ರಿಯ ಎಂಬ 13 ವರ್ಷದ ಹೆಣ್ಣುಮಗಳು ತಾನೇ ಬರೆದು, ಹಾಡಿದ್ದಾಳೆ] 

ಹೆಣ್ಣು ಮಗಳಮ್ಮ ನಾನು ಹೆಣ್ಣು ಮಗಳೇನೆ

ನೋವ್ಯಾಕಮ್ಮ ನಿನಗೆ ಭಯವೇಕಮ್ಮ||

ಅಷ್ಟಮಿಯ ದಿನದಂದು, ಅಮ್ಮ, ಹುಟ್ಟಿದ ಕಾರಣಕೆ

ಈ ಹಾಳು ಲೋಕದಲಿ, ಅಮ್ಮ, ಕೀಳಾಗಿ ಕಾಣುವರಾ

ಹೆಣ್ಣೆಂದು ಕೇಳುವರಾ, ಛೀ ಎಂದು ದೂಡುವರಾ

ಅಷ್ಟಮಿಯ ದಿನದಿ ಹುಟ್ಟಿದ ಕೃಷ್ಣಂಗೆ ಪೂಜೆಯ ಮಾಡುವರಾ

ನನ್ನನ್ನು ಕಸದಂತೆ ನೋಡುವರಾ||

ಪಾಟಿ ಬಳಪ ಹಿಡಿದು ಅಮ್ಮ ಶಾಲೆಗೆ ನಾ ಹೋದರೆ

ಹೆಣ್ಣಾಗಿ ಹುಟ್ಟಿದ್ದಕ್ಕೆ ಅಮ್ಮ ಓದ್ಯಾಕೆ ಎನ್ನುವರಾ

ಓದ್ಯಾಕೆ ಎನ್ನುವರಾ ಅಮ್ಮ ಖರ್ಚೆಂದು ಹೇಳುವರಾ

ಓದಿನ ತಾಯಿ ಸರಸ್ವತಿಯು ಹೆಣ್ಣಲ್ಲವೇನಮ್ಮ

ನಂಗೇನೋ ಓದ್ಯಾಕೆ ಎನ್ನುವರಾ||

ಬೆಳೆದಿರುವ ನನ್ನ ನೋಡಿ ಅಮ್ಮ ನೀನ್ಯಾಕೆ ಅಳುತೀಯೆ

ಲಕ್ಷ ವರದಕ್ಷಿಣೆಯ ಅಮ್ಮ ಎಲ್ಲಿಂದ ಕೊಡಲೆಂದು

ಹೆಣ್ಣೆಂದು ತಿಳಿದಾ ಕ್ಷಣವೇ ಭ್ರೂಣ ತೆಗೆಸುವರೇಕಮ್ಮ

ಹೆಣ್ಣು ಮಕ್ಕಳೇ ಬೇಡೆಂದುಕೊಂಡರೆ ಸೃಷ್ಟಿಗೆ ಮೂಲವೆಲ್ಲಿ

ನಾಳೆಯ ಜಗಕೆ ದಾರಿಯೆಲ್ಲಿ||

ಅನುವಾದ - ಉಷಾಗಂಗೆ