ಕವನ - ಭಾಳ ಒಳ್ಳೇವ್ರು ನಮ್ಮಿಸ್ಸು

ಭಾಳ ಒಳ್ಳೇವ್ರು ನಮ್ಮಿಸ್ಸು

ಕೋಪಮಾತ್ರ ತುಸು ಹೆಚ್ಚು

ತಪ್ಪಿಗೆ ಬೈತ ಒಪ್ಪಿಗೆ ಒಪ್ತಾ

ಅವರೇ ನಮ್ಮ ಫೇವರಿಟ್ಟು 

ಮೊಗವೋ ಬೆಳ್ಳಿಚಂದಿರ

ನಗುವೋ ಒಳ್ಳೆ ಸುಂದರ

ಕಣ್ಣಲಿ ಒಲವಿನ ಹೊಳಪದು ಇಂಗದು

ಮನ ನಿಷ್ಕಲ್ಮಷ ಮಂದಿರ

ಕ್ಲೀನು ಕ್ಲೀನು ಅಂತಾರೆ

ಕ್ಲೀನಲ್ಲಾಂದ್ರೆ ಕೆರಳ್ತಾರೆ

ತಾವು ಪಾಲಿಸಿ ನಮಗೂ ಕಲಿಸಿ

ಹೈಜೀನ್ ಗೆ ಜೈ ಅಂತಾರೆ

ಮಕ್ಕಳ ಜೊತೆ ಮಗುವಾಗ್ತಾರೆ

ಚಂದಮಾಮ ಕಥೆ ಹೇಳ್ತಾರೆ

ಉಡುಗೊರೆ ಆಟಿಕೆ ತಂದುಕೊಡುತಾ

ಇವರೆ ಸ್ಯಾಂಟಾ  ಕ್ಲಾಸಾ ಆಗ್ತಾರೆ

ಸಂಘ ಸಮಾಜ ಕಟ್ತಾರೆ

ಹೆಣ್ಣಿನ ಕಷ್ಟಕೆ ಆಗ್ತಾರೆ

ಹೆಣ್ಣಿಗೆ ಧೈರ್ಯ ಸ್ಥೈರ್ಯವ ತುಂಬಿ

ಮುನ್ನಗ್ಗಲು ಜೊತೆಯಾಗ್ತಾರೆ

ಎಲ್ಲರನ್ನೊಂದು ಮಾಡ್ತಾರೆ

ನಾಯಕಿಯಾಗಿ ನಡೆಸ್ತಾರೆ

ನಮ್ಮಲ್ಲಿರುವ ಕಲೆಯನು ಗುರುತಿಸಿ

ಗುರಿ ಮುಟ್ಟಲು ನೆರವಾಗ್ತಾರೆ

ನ್ಯಾಯಕೆ ತಲೆಯ ಬಾಗ್ತಾರೆ

ಅನ್ಯಾಯಕೆ ಸಿಡಿದು ನಿಲ್ತಾರೆ

ಯಾರೆ ಅಡ್ಡಿ ಬಂದರೂ ಹೆದರದೆ

ಬಿಡದೆ ಹೋರಾಟ ಮಾಡ್ತಾರೆ

ಅವರೆಲ್ಲಿದ್ದರೆ ಅಲ್ಲೆ ಚರ್ಚೆ

ಬಹು ವಿಷಯಗಳಾ ವಿಮರ್ಶೆ

ಕಲಿಯಲು ಕಲಿಸಲು ಸರ್ವದಾಸಿದ್ಧ

ಮನೆಯೋ ಅವರದು ಪುಸ್ತಕ ಪರಿಶೆ

ಬಾಲ್ಯದಿಂದಲೂ ಕ್ರಾಂತಿಯ ಹಾದಿ

ರಕ್ತಕೂ ಧರ್ಮಕು ಅಂಟದ ಜಾತಿ

ಭಾಳ ಕಲಿತೆವು ಬಾಳನು ಅರಿತೆವು

ಮನಕನಿಸಿಸುದ ಮಾಡಲು ಇಲ್ಲ ಭೀತಿ

ವಾಟ್ಸಾಪ್ ನಲ್ಲು ಬೆಸೆದರು ಕೊಂಡಿ

ಮಾಡಿದರಿದನು ಕಲಿಕಾಬಂಡಿ

ಗಣಿತ ವಿಜ್ಞಾನ ಸಮಾಜ ವಿಸ್ಮಯ

ಜ್ಞಾನದ ಹಸಿವಿಗೆ ದೊರೆವುದು ತಿಂಡಿ

- ಉಷಾಗಂಗೆ