ಕವನ - ಚಲುವಿನ ಜಲಸಿರಿ

ಚೆಲುವಿನ ಜಲಸಿರಿ

ಚೆನ್ನಗಿರಿ

ನಯನ ಮನೋಹರಿ

ನೋಡಲೇ ಬೇಕು ಬನ್ನಿರಿ

ಸ್ಕಂದ ನಂದಿಯ ನಡುವೆ

ಸಸ್ಯ ಸಂಪತ್ತಿನ ಕಣಿವೆ

ವಿಧ ವೈಶಿಷ್ಟ್ಯಗಳೊಡನೆ

ಅವಳು ಅಪೂರ್ವ ಚೆಲುವೆ

ಅಲ್ಲಿನ ಜಲಪಾತ ಚೆನ್ನ

ಬೆಳ್ಳಿ ಬಾಣದಂತೆ ಸಣ್ಣ

ಜಳಜಳದ ಸದ್ದು ಎನ್ನ

ಕರ್ಣಕಿಂಪು ತಂಪಾಗಿಸುವುದು ಕಣ್ಣ

ಎತ್ತರದಿಂ ಹರಿದು

ಬೇರು ನಾರುಗಳ ಸವಿದು

ಬಂಡೆಕಾಂಡಗಳ ಕೊರೆದು

ನುಸುಳುವಳು ನಲಿದು

ಒಂದೆಡೆ ಜಾರುತ್ತಾ ಒಂದೆಡೆ ಚಿಮ್ಮುತ್ತ

ಅಲ್ಲೊಮ್ಮೆ ಇಲ್ಲೊಮ್ಮೆ ಮಲಗುತ್ತ ಬಳುಕುತ್ತ

ಮಣಿಯಂತೆ ಅಲ್ಲಿ ಬಲುರಭಸ ಇಲ್ಲಿ

ಫಳಫಳನೆ ಹೊಳೆಯುವಳು ರವಿಹೊನಲಿನಲ್ಲಿ

ಹಸಿರುಹಟ್ಟಿಯಲೇಳಿ

ಕಾಡುಕಟ್ಟೆಯ ಸೀಳಿ

ಪುಟಿಯುತ್ತ ಆಡುವಳೀ

ಜಲರಂಗಿನ ಹೋಳಿ

ತಾಗಿದರೆ ತಣಿಸುವಳು

ಸೋಕಿದರೆ ಸೆಳೆಯುವಳು

ನೆಂದರೆ ನಗಿಸುವಳು

ಮಿಂದರೆ ಎಲ್ಲ ಮರೆಸುವಳು

ನೋಡಿ ಬಂದರೆ ನೆನೆಯದಿರಲಾರೆವು

ಆಡಿ ಬಂದರೆ  ಹಾಡದಿರಲಾರೆವು